გიორგი მიქაუტაძემ საფრანგეთის თასზე გაიტანა - „ლიონი“ მომდევნო ეტაპზე გავიდა
გიორგი მიქაუტაძემ საფრანგეთის თასზე გაიტანა და „ლიონს“ გასვლით მატჩში სამოყვარულო გუნდის, „ფინი ოლნუას“ დამარცხებაში დაეხმარა – 2:1.
საფრანგეთის თასის 1/32-ფინალური ეტაპის ერთმატჩიან დაპირისპირებაში ლიგა 1-ის გუნდს რანგით მე-4 ლიგის (ნაციონალ 2) მონაწილე დაუპირისპირდა. „ფინი ოლნუამ“ სტუმრებს დიდი წინააღმდეგობა გაუწია და საბოლოოდ, მინიმალური სხვაობით დამარცხდა.
ანგარიში 44-ე წუთზე საიდ ბენ-რაჰმამ გახსნა, ხოლო 88-ე წუთზე მისი გადაცემით თავი გიორგი მიქაუტაძემ გამოიჩინა, რომელიც სათადარიგოთა შორის იყო და მოედანზე 67-ე წუთზე შევიდა. მასპინძლებმა ბოლომდე იბრძოლეს და პრესტიჟის გოლის გატანა მოახერხეს.
ამ მატჩით „ლიონისთვის“ 2024 წელი დასრულდა – ქართველი თავდამსხმელის გუნდი შემდეგ შეხვედრას 2025 წელს ჩაატარებს – „ლიონი“ 4 იანვარს „მონპელიეს“ უმასპინძლებს.
