დავითაშვილის „სენტ-ეტიენი“ საკუთარ მოედანზე „რენთან“ დამარცხდა

ზურიკო დავითაშვილის „სენტ-ეტიენმა“ საფრანგეთის ლიგა 1-ში „რენს“ უმასპინძლა და დაძაბული დაპირისპირება 0:2 დათმო.

საფრანგეთის ჩემპიონატის 21-ე ტურის შეხვედრა მეტოქეებმა მაღალ ტემპში დაიწყეს, ანგარიშის გახსნა ორივე გუნდს შეეძლო, მაგრამ ეს მე-15 წუთზე კონტრშეტევაზე სტუმრებმა მოახერხეს და არნო კალიმუენდოს ზუსტი დარტყმით დაწინაურდნენ.

დავითაშვილი „სენტ-ეტიენის“ შემადგენლობაში გამორჩეული იყო, შეტევების გამწვავებას ცდილობდა, მცველებს აწუხებდა, მაგრამ საბოლოოდ ქართველის მცდელობებს შედეგი არ მოუტანია. 85-ე წუთზე კი „რენმა“ მაჰამადუ ნაგიდას გოლით უპირატესობა გაზარდა და საბოლოოდ 2:0 მოიგო.

საფრანგეთის ლიგა1-ში გამართული 21 ტურის შემდეგ „სენტ-ეტიენი“ 18 ქულით მე-16 ადგილზეა.