ქართველი ტყვიის მსროლელი სანდრო ხოსიტაშვილი ევროპის ვიცე-ჩემპიონია
ესტონეთის დედაქალაქ ტალინში მიმდინარეობს 16- და 18-წლამდელთა ევროპის ჩემპიონატი ტყვიის სროლაში. ქართველმა მსროლელმა სანდრო ხოსიტაშვილმა 16-წლამდელებს შორის 10-მეტრიან დისტანციაზე პნევმატური პისტოლეტის სროლაში ვერცხლის მედალი მოიპოვა.
კონტინენტის პირველობის ფინალში ქართველი მსროლელი უნგრელ თანატოლს დაუპირისპირდა და შეხვედრა ანგარიშით 11:12 დათმო.
ქართველი ტყვიის მსროლელები ტალინში ევროპის ჩემპიონატზე საქართველოს სპორტის სამინისტროს მხარდაჭერით იმყოფებიან.
აღსანიშნავია, რომ 16-წლამდელთა შორის ევროპის პირველობა ტყვიის სროლაში პირველად ტარდება.
