ღონისძიება გახსნა საქართველოს საქმეთა დროებითმა რწმუნებულმა, დეა მუმლაძემ. სტუმრებს, ასევე სიტყვით მიმართეს ათენში საქართველოს დღეებისათვის თბილისიდან სპეციალურად ჩამოსულმა, საგარეო საქმეთა სამინისტროს დიასპორასთან ურთიერთობის დეპარტამენტის დირექტორმა, მუხრან გულაღაშვილმა და ათენში საქართველოს ახლადდანიშნულმა კონსულმა, გელა ჯაფარიძემ, რა დროსაც ხაზი გაუსვეს მსგავსი ღონისძიებების მნიშვნელობას ათენში მცხოვრები ქართული დიასპორისთვის და მადლიერება გამოხატეს დიასპორული ორგანიზაციების მიმართ ათენში ქართული დღეების ორგანიზებისთვის. ამასთანავე, გამომსვლელებმა კიდევ ერთხელ აღუთქვეს თანადგომა ქართული დიასპორის წარმომადგენლებს და მადლობა გადაუხადეს მათ საბერძნეთში ქართული ენისა და კულტურის პოპულარიზაციის საქმეში შეტანილი წვლილისთვის.

 ღონისძიების ფარგლებში ქართული დიასპორული ორგანიზაციების თეატრალური და ქორეოგრაფიული ჯგუფების მიერ წარმოდგენილი იქნა ქართული ტრადიციული ცეკვები და ნაწყვეტები ცნობილი სპექტაკლებიდან, ხოლო ქართულმა ვოკალურმა ჯგუფებმა შეასრულეს პოპულარული ქართული სიმღერები. ამასთანავე, ამფითეატრის მიმდებარე ტერიტორიაზე გაიმართა ემიგრანტი ქართველი მხატვრების ნამუშევრებისა და ხელნაკეთი ნივთების გამოფენა-გაყიდვა, ტრადიციული ქართული კერძების, ნუგბარის და ღვინის დაგემოვნება. ასევე, სახალისო სპორტულ შეჯიბრებებში მონაწილეობა მიიღეს სკოლამდელი და მოზრდილი ასაკის ქართველმა ბავშვებმა, რამაც საქართველოს მოქალაქეებისა და მოწვეული სტუმრების დიდი მოწონება დაიმსახურა.

 ღონისძიებას საპატიო სტუმრის სტატუსით ესწრებოდა ნოდარ დუმბაძის სახელობის მოზარდმაყურებელთა პროფესიული სახელმწიფო თეატრის დასი, რომელიც საგარეო საქმეთა სამინისტროს მიერ დაფინანსებული „დიასპორული ინიციატივების მხარდაჭერის პროგრამის“ ფარგლებში 21 ოქტომბერს მაყურებლების წინაშე წარდგა სპექტაკლით „მზიანი გული“.

 აღსანიშნავია და სასიხარულოა, რომ ქართული დღეები ათენში წელს მესამედ ჩატარდა და ღონისძიებამ უკვე ტრადიციული სახე მიიღო, რაც ათენში მცხოვრები ქართველი ემიგრანტებისთვის სამშობლოსთან კავშირის ერთგვარ სიმბოლოდ იქცა.

 საქართველოს საელჩო ათენში მადლობას უხდის ყველა მონაწილეს და ღალაცის მუნიციპალიტეტის ადმინისტრაციას ათენში ქართული დღეების ჩატარებაში შეტანილი წვლილისთვის. ასევე დიდი მადლობა გვინდა გადავუხადოთ ღონისძიებაზე მოსულ ყველა სტუმარს. მადლობა ღონისძიების მხარდამჭერს - @საქართველოს ბანკს.

იუწყება საქართველოს საელჩო საბერძნეთში