იტალია: ხელისუფლებამ ნეონაცისტური „ვერვოლფის ქვედანაყოფის“ 12 წევრი დააკავა
ოფიციალური წყაროების ცნობით, ორშაბათს დილით იტალიის ხელისუფლებამ ნეონაცისტური ჯგუფის, „ვერვოლფის ქვედანაყოფის“ 12 წევრი დააკავა.
იტალიის სახელმწიფო პოლიციის პრეს-რელიზში ნათქვამია, რომ ჯგუფი ექსტრემისტული იდეოლოგიის პროპაგანდას ეწეოდა და გეგმავდა ძალადობრივ თავდასხმებს, მათ შორის - ხელისუფლების წარმომადგენლებზე.
ჯგუფი განსაკუთრებით აქტიურობდა „ტელეგრამ-არხზე“, სადაც „ვერვოლფის ქვედანაყოფის“ წევრები იტალიის დემოკრატიული სისტემის დამხობის და არიული უპირატესობის იდეალებზე დაფუძნებული ავტორიტარული სახელმწიფოს შექმნის გეგმებს იხილავდნენ. პოლიციის განცხადებით, ასევე იმართებოდა პირადი შეხვედრები დაჯგუფების წევრების მომზადების საკითხებზე სამსჯელოდ.
ხელისუფლებამ 25 სახლი გაჩხრიკა სხვადასხვა ქალაქში, მათ შორის: ბოლონიაში, რომში, მილანში, ნეაპოლში, პალერმოსა და ტრიესტში.
ნეონაცისტური ჯგუფის წევრების დაკავების ოპერაციას წინ უძღვოდა ორწლიანი გამოძიება, რომელშიც ანტიტერორისტული დანაყოფები, ასევე კიბერუსაფრთხოებასა და ექსტრემიზმთან ბრძოლაში სპეციალიზირებული პოლიციის სტრუქტურები მონაწილეობდნენ.
